اللي بيحصل في فلسطين دلوقتي ده لعبة قديمة ومخطط معروف اسمه صفقة القرن ، واللي بقوله ده مش سر ولا مؤامرة كونية لا دي حقيقة امريكا نفسها اقرت بيها .
صفقة القرن عبارة عن ان اسرائيل تضم الضفة الغربية وترحل سكانها للأردن ، اما قطاع غزة فيتم ترحيل سكانه لسيناء .
طيب عشان ده يحصل ايه اللي المفروض اسرائيل تعمله ؟
1- المفروض ان اسرائيل تفتعل اشتباكات وتستفز الشعب الفلسطيني ، ومفيش اكتر من القدس والمسجد الأقصى اللي يحقق الاستفزاز ده ، وبعد كده السيناريو معروف ومتكرر .
2- المقاومة البلاستيك تبدأ تضرب صواريخ على إسرائيل وغالبيتها غير مؤثرة إطلاقاً ، وبقول غالبيتها لأن في بعض فصائل المقاومة الوطنية بتضرب صواريخ حقيقية في بعض الأحيان .. لكن في المجمل معظم الصواريخ غير مؤثرة إطلاقاً .
3- إسرائيل تسيب الوضع كده وتفضل تضرب غزة وغزة تضرب فيها لحد ما العالم كله ينتبه للي بيحصل هناك وصور الشهداء والجرحى تستفز مشاعر العرب والمسلمين اكتر .
4- بعد عدة أيام من الإشتباكات تقرر إسرائيل انها تبدأ الحرب الشاملة ، وتحرك قواتها البرية على الأرض في اتجاه قطاع غزة ومن هنايبدأالإجتياح.
5- تبدأ عملية إجتياح بري مدعوم بضربات جوية مكثفة على قطاع غزة هتخلف ورائها آلاف الشهداء والجرحى ، قطاع غزة مش هيقدر يعمل حاجة ولا يتحمل عدد الشهداء والمصابين وفي نفس الوقت المقاومة بتضرب صواريخ من داخل بيوت المدنيين في القطاع فبالتالي اسرائيل بتضرب البيوت دي وتقول للعالم كله بصوا اهم بيضربونا من البيوت .
6- مع تصاعد المعارك وارتفاع عدد الشهداء والمصابين بيبدأ الناس في قطاع غزة يزحفوا ناحية معبر رفح ويتكدسوا هناك بعشرات الآلاف بل بمئات الآلاف كمان بأوامر من حركة حماس الإخوانية وعلى الجانب الأخر هما عايزين يهربوا من القصف فعلا ويتعالجوا .
7- تظهر الصور في كل وكالات الأنباء ان الشعب الفلسطيني متكدس عند معبر رفح لكن السلطات المصرية رافضة تفتح المعبر ، ويبدأ هنا الصريخ والعويل والمظلومية ، بصوا شوفوا المصريين مش عايزين يحمونا ، بصوا شوفوا المصريين مش عايزين يعالجوا المصابين ، بصوا شوفوا مش عايزين يدخلوا الاطفال والنساء والشيوخ ، بصوا شوفوا المصريين الخونة اللي باعونا ، بصوا شوفوا حقوق الإنسان عند المصريين عاملة ازاي ، وين العرب والمسلمين .الخ
8- مصر لو فتحت المعبر يبقى حققت الهدف الإسرائيلي وسيناءكده راحت والقضية الفلسطينية كمان راحت وكل سنة وانتوا طيبين ، ولو قفلت المعبر هيتقال عليها أقذر كلام ممكن تسمعوه من الدنيا كلها .
9- طبعا الكلام ده كله بيحصل امتى بقى ؟ في عز ما مصر بتحضر لتصفية ملف سد النهضة وإحتمال قيام حرب في الجنوب مع إثيوبيا .. يبقى لازم نشتت المصريين ونحطلهم موضوع سيناء والغزاوية زي الشوكة في الزور عشان نبوظلهم حسابتهم .
المصريين اكتر ناس في الدنيا دي كلها عارفين الإسرائيلين كويس ، خضنا معاهم حرب 48 ، 56 ، 67 ، حرب الإستنزاف ، 73 ، حروب مخابراتية مستمرة حتى الان . يعني احنا ادرى الناس بيهم وبطريقة التعامل معاهم .
عشان كده بنقول ان اللي بيحصل في فلسطين ده دلوقتي هو مخطط صهيوني لتصفية القضية الفلسطينية ، وان حركة حماس وباقي حركات المقاومة العميلة بتساهم في المخطط ده بالإشتراك مع الصهاينة .
طبعا قلوبنا بتحترق عشان فلسطين والقدس والمسجد الأقصى ، والود ودنا لو نخش نجيب رقابهم ونوريهم الرجولة والمقاومة الحقيقية بتبقى عاملة ازاي.لكن احنا اذكى من كده لأن اللعب مع الصهاينة لازم يكون بطريقتهم .لأن دول ناس بتعيش على المظلومية ، زي الإخوان بالظبط ميفرقوش عنهم حاجة .
يبقى الحل في أيد الفلسطينيين انهم يتوحدوا ويطهروا أنفسهم بأنفسهم ويتفقوا على كلمة واحدة ويقفوا خلف رجل واحد منهم عشان ساعتها العالم يقدر يدعمهم واحنا كمان نقدر ندعمهم بشكل مناسب .
اما سيناريو ترحيل قطاع غزة في سيناء فمصر قادرة تحمي أمنها القومي ، ولو إسرائيل عدت الخط الأحمر واستمرت في مخططها ده يبقى أركنلي بقى الصواريخ البلاستيك اللي بتتحدف عليكم دي واتحملوا اللي ممكن يحصلكم .
عشان الحرب الجاية اللي بينا وبينكم مش هتبقى زي اللي فات ، هتبقى حرب إبادة.ولو انتوا مستعدين دلوقتي لحرب زي دي فأهلا بالمعارك ، لا المعبر هيتفتح ولا هنسمحلكم بالتوغل البري في القطاع اصلا .
ارجعوا افضل لأن مخططكم مكشوف ومعمول حسابه .
