صاحبة فيديو الفستان الأزرق: أنا في كلية آداب.. وبقيت مكسوفة أنزل الشارع بعد اللي حصل لي

تحدثت ياسمين صاحبة فيديورقص فتاة الفستان الأزرق عن المعاناة التي تعرضت لها، بعد انتشار الفيديو الشهير لها وهي ترقص في فرح صديقتها، وذلك خلال مداخلتها في برنامج 90 دقيقة.

وقالت ياسمين صاحبة واقعة الفستان الأزرق، أنا بجد مش مسامحة أي حد اتكلم في حقي وفي عرضي، وحسبي الله ونعم الوكيل في اللي نزل الفيديو، واللي طلعوا عليا شائعات وكلام مش كويس، وأنا بقيت مكسوفة أنزل الشارع، وانا كنت في فرح صاحبتي مش بعمل حاجة غلط، و90% من اللي واقفين كانوا ستات، والفرح كان عائلي، وناس قالت عليا رايحة تجيب عريس، والناس مش متخيلة الوجع اللي أنا ووالدتي استحملناه، ومينفعش حد يحكم على تاني بالطريقة دي.

واستكملت باكية: الناس ساكته على فيديوهات تيك توك ومسكوا فيا، والموضوع مؤذي نفسيًا جدًا، وحاجة متمنهاش لغيري، والتنمر والكلام الوحش اللي بتعرض ليه بيوجع.

وعن تفاصيل الفرح التي ظهرت فيه ياسمين صاحبة فيديو الفستان الأزرق قالت: والدة العروسة ووالدتي قرايب، وأنا معرفش مين إلي صور الفيديو، وعملت بلاغ أول ما الفيديو اتنشر، وإن شاء الله حقي هيرجع.

أما بالنسبة لموضوع زواجها وطلاقها بسبب الفيديو المنتشر قالت ياسمين: أنا مش متزوجة، وأدرس في كلية الآداب بقسم الآثار في جامعة المنصورة، وتعرضت لإساءات في الجامعة بسبب الفيديو، ومكنتش عاوزة أكمل امتحانات.

وفي نهاية حديثها وجهت ياسمين رسالة للشخص الذي تسبب في نشر الفيديو قائلة، حسبي الله ونعم الوكيل فيك، ويبتليك في أعز ما ليك، وربنا هينتقم منه بطريقته، وأنا ماليش غير ربنا.