مرتضى منصور يفتح النار على عمرو أديب بعد تتويج الزمالك بكأس مصر

فتح مرتضى منصور رئيس نادي الزمالك النار على الإعلامي عمرو أديب مؤكدًا أن الأخير تجاهل توجيه الشكر إلى مجلس إدارة الفارس الأبيض بعد تتويج الفريق ببطولة كأس مصر على حساب الأهلي.

وقال مرتضى منصور خلال مداخلة هاتفية ببرنامج “ملعب البلدوزر” الذي يقدمه مجدى عبد الغنى : “عمرو أديب طلع إمبارح شكر البلاط والنجيلة والعارضة وعامل غرفة الملابس ومخلاش حد مشكرهوش”.

وأشار :”ماعدا مجلس الإدارة المحترم ورئيسه، مع إنه لما كان الزمالك بيحصل فيه أي إخفاق كان بيطلع يترقص، ويقول: الزمالك خرب وإني خربت النادي، وأنا بقول له: لم نفسك”.

وأضاف “مرتضى” : “عمرو أديب بيقول إنه زملكاوي وأنا بقول له لو إنت زملكاوي عندك 5 أو 8 مليارات جنيه ابعت لي منهم مليارًا أو 100 ألف جنيه أشتري لعيبة”.

وتابع :”كفاية بقى إحنا قرفنا، وإنت عمرك ما كنت زملكاوي، ولكن بتركب الموجة، لما الزمالك بيكسب وياخد بطولة وتطلع تترقص، ده انت شكرت الناس كلها، وتجاهلت مجلس الإدارة وأمير مرتضى المشرف على الكرة”.

ووجه “مرتضى” حديثه لـ “عمرو أديب” قائلا : “الغل واكل قلبك يا عمرو أديب، وبحذرك للمرة الأخيرة إنت وصاحب القناة اللي شغال فيها ملكش دعوة بالزمالك، والزمالك لما تيجي تتكلم له رئيس محترم اسمه المستشار مرتضى منصور ومجلس إدارة محترم ومشرف على الكرة”.

وأكمل: “إنت مالك بالزمالك يا عمرو أديب؟!، ناسي لما كنت إنت وأحمد موسى وشوبير لما سألتوا وزير الرياضة عن عدد المخالفات اللي عليَّا، ولما رجعنا رجعنا كسبنا الانتخابات باكتساح، أنا الرئيس التاريخي للزمالك غصب عنك”.