جمله قالها السادات للعرب بعد اتفاقيه السلام مصر لن تركع 

بعد اتفاقية كامب ديفيد؛ الفلسطينيين والسوريين زادوا في حربهم ضد مصر والرئيس السادات.

وفي وسط الفرحة المصرية برجوع الأرض، بيوصل خبر خطف سفيرنا في اليونان!

الرئيس السادات عمل اجتماع عاجل مع كبار رجال الدولة، وقالهم: “طبعًا الفلسطينيين اللي عملوها زي ما موتوا يوسف السباعي..
شوفوا مين من قيادتهم هنا وهاتوهولي فورًا”.

وبالفعل، خلال ساعة وصلت مجموعة من القيادات الفلسطينية اللي موجودة في القاهرة.

وأول ما وصلوا، دخل عليهم السادات وقالهم:
“قدامكم 3 ساعات والسفير يرجع، وإلا هتتحملوا مسئولية اللي هعمله”.

وقبل ما يردّوا، ساب المكان ومشي.

الفلسطينيين ركبهم بدأت تخبط في بعضها، وواحد منهم قال للباقيين:
“هنعمل إيه في المصيبة دي؟”.

لكن اللي حواليه استهونوا بالكلام وقالوله:
“ولا مصيبة ولا حاجة”..
رد وقالهم: “إنتم ما تعرفوش السادات… السادات ده (حَنش)، يسكت يسكت، بس لما يقرص السم بتاعه قاتل ملوش علاج”.

والكلمة عملت رعب لباقي القيادات الفلسطينية، واتصلوا بياسر عرفات وبلغوه بإنذار الـ3 ساعات.

ياسر عرفات قالهم:
“بلغوا السادات إن منظمة التحرير ملهاش علاقة.. والسوريين هما اللي عملوها”.

ورجعت القيادات الفلسطينية للرئيس السادات وبلغوه برسالة عرفات، وإن السوريين، بأمر من حافظ الأسد، هما اللي خطفوا السفير المصري.

السادات قالهم: “هاتولي عرفات على التليفون”.

وفورًا، حصل الاتصال..

ومن غير سلام، الرئيس السادات قاله:
“اسمع يا عرفات، بلّغ السوريين وحافظ إني هضرب دمشق لو السفير بتاعي مرجعش بعد 3 ساعات..
وبالمناسبة، اللي بتعملوه ده لعب عيال، أنا كنت بأعمله وأنا عندي عشرين سنة، العمليات بتاعتكم دي لا هتقدم ولا هتأخر”!

ياسر عرفات رد وقاله:
“طب خليهم 6 ساعات يا ريس عشان أقدر أوصل للسوريين وأتفاهم معاهم”..

ووافق السادات على مد المهلة لـ6 ساعات.

وبعد المكالمة، ياسر عرفات بلغ حافظ الأسد بتهديد السادات، وقاله:
“يا أخ حافظ، إنت عارف إن السادات ما بيقولش كلام، وشكله ناوي يضرب دمشق فعلًا، وأديك شفت عمل إيه مع القذافي”..

وكان يقصد عملية التأديب اللي حصلت لليبيا لمدة 4 أيام، سنة 77، بعد ما القذافي تطاول على مصر وهاجم قواتنا على الحدود.

وبالفعل..
حافظ الأسد فهم الرسالة، وقبل ما الـ6 ساعات تنتهي، السفير بتاعنا رجع.

رحم الله البطل الأسطوري محمد أنور السادات.

مصر لن تركع