عيلة واحدة بس.. اتجوزت فاتن حمامة وشادية ومريم فخر الدين وعزيزة أمير وزهرة العلا وكوثر شفيق! مش خيال، دي عيلة ذو الفقار.
الحكاية كلها بدأت من فوق خالص من عند الأميرالاي أحمد مراد بك ذو الفقار، عميد الداخلية ومدير أمن المحلة الكبرى، ووالدته نبيلة هانم اللي أصلها فرنسي. راجل صعيدي أرستقراطي خلف 8 أولاد، 6 ولاد وبنتين. وكلهم اتربوا في العباسية.
أول فرع في الشجرة هو الكبير محمود ذو الفقار، المهندس اللي ساب وزارة الأشغال ودخل السينما.
اتجوز رائدة السينما عزيزة أمير سنة 1940 وعملوا مع بعض واحدة من أول شركات الإنتاج في مصر، وفضلوا سوا لحد ما ماتت في 28 فبراير 1952.
بعد وفاتها بست شهور بس، وتحديدا في أغسطس 1952، شاف بنت اسمها مريم فخر الدين في فيلم، فأعجب بيها واتجوزها.
مريم نفسها قالت بعد كده الجوازة دي كانت غلطة جت بالصدفة. خلفوا بنتهم إيمان اللي شفناها طفلة في فيلم ملاك وشيطان، وعاشوا 8 سنين لحد 1960.
الطلاق كان بسبب الغيرة القاتلة، ومريم حكت في برنامج العاشرة مساء إنه كان بياخد كل فلوسها لدرجة إنها كانت بتخبي الفلوس في كيس الشراب عشان تعرف تصرف.
تاني فرع وهو عز الدين ذو الفقار. ظابط جيش وساب الجيش عشان الإخراج. سنة 1947 شاف بنت صغيرة اسمها فاتن حمامة في الاستوديو، وقع في حبها واتجوزها وخلفوا نادية عز.
عاشوا 7 سنين وانفصلوا سنة 1954 لما فاتن قابلت عمر الشريف. الغريب بقى إن بعد الطلاق عز وفاتن بقوا أصحاب، وأخرجلها أهم أفلامها وهو مطلقها، طريق الأمل وبين الأطلال ونهر الحب وامرأة في الطريق.
وفي نفس سنة طلاقه من فاتن، سنة 1954، اتجوز الفنانة كوثر شفيق اللي استمرت معاه لحد ما مات يوم 1 يوليو 1963. كوثر خلفت له دينا عز ذو الفقار اللي بقت موزعة أفلام وناشطة بيئية.
نيجي بقى للصغير ، صلاح ذو الفقار. أبوه كان نفسه يبقى دكتور زي جده، فدخله طب اسكندرية. بس صلاح ساب الطب وراح كلية البوليس زي أبوه.
صلاح اتجوز 4 مرات، الأولى هي نفيسة بهجت، بنت محمود بك بهجت ومن رائدات العمل الاجتماعي وصاحبة فاتن حمامة، وكانت تقرب له.
اتجوزها سنة 1947 وهي أم ولاده الاتنين أحمد ومنى، وفضلت على ذمته حتى وهي متوفية سنة 1988 رغم إنه اتجوز عليها، لأنه كان بيعتبرها أم العيال.
أثناء تصوير فيلم رد قلبي سنة 1957، حب زميلته في الفيلم زهرة العلا، والفرح اتعمل في الاستوديو وكل طاقم الفيلم حضر. بس الجوازة دي ماكملتش 18 شهر واتطلقوا.
القصة الأكبر كانت مع شادية. اتجوزوا سنة 1964 وعملوا أحلى ثنائي في السينما، أغلى من حياتي ومراتي مدير عام وكرامة زوجتي وعفريت مراتي.
كانوا بيحبوا بعض بجنون وشادية كانت نفسها تخلف منه، وحملت مرتين وسقطت، فحالتها النفسية ساءت وده كان سبب طلاقهم سنة 1972 بعد 8 سنين جواز، لكن فضلوا زمايل وأصحاب.
آخر جوازة كانت من بره الوسط، السيدة بهيجة مقبل اللي فضلت معاه لآخر عمره.
العيلة بقى كبرت وبقى ليها أحفاد. صلاح ابنه أحمد ذو الفقار بقى مهندس ورجل أعمال كبير ومشهور، وبنته منى ذو الفقار بقت واحدة من أقوى 100 سيدة أعمال ومحامية دولية حسب فوربس، واتجوزت المحامي الكبير علي الشلقاني.
أحمد صلاح رجل الأعمال كريم أحمد ذو الفقار والمهندس صلاح أحمد ذو الفقار. والمحامية مني خلفت إنجي الشلقاني.
وكمان في فرعين هاديين في العيلة بعيد عن الفن، كمال ذو الفقار اللي كان لواء في الجيش، وممدوح ذو الفقار اللي كان رجل أعمال كبير.
يعني من الآخر دي مش مجرد عيلة، ده تاريخ السينما المصرية كله ماشي على رجلين، من الإنتاج والإخراج للتمثيل للمحاماة والبيزنس، وكل جوازة وراها فيلم وكل طلاق وراه حكاية.
