من 55 سنة بالتمام والكمال، الصحافة المصرية طالبت بسحب الجنسية من الفنان العالمي عمر الشريف، ووصفته بـ«الممثل الرقيع»، ووصلت لحد «تخوينه».. عشان «بوسة»!
من بين الصحف اللي تبنت الدعوة دي مجلة «الكواكب» الشهيرة، واللي نشرت مقال بعنوان: «امنعوا الجنسية العربية عن هذا الممثل الرقيع»..
ليه كده يا «كواكب»؟
قالتلك تعالى أحكيلك الحكاية من الأول:
كنا دايمًا بنحاول نلتمس الأعذار لـ«عمر الشريف»، والكل بيحاول أنه يساعده وييسر أموره، ولما واجه مشكلة في تجديد عقد العمل اللي معاه الصادر عن حكومة الجمهورية العربية المتحدة، على أعتبار أن ده بيعوق رجوعه لبلده، تبنينا حملة هنا وطالبنا تجديده، ولما اتواصلنا مع وزارة الداخلية بلغتنا إن العقد الجديد جاهز وممكن يستلمه في أي وقت..
كنا بنحاول نبرر تصرفاته «الصعبة»، ومن بينها مشاركته في فيلم «لورانس العرب» رغم ما فيه من إساءات وافتراءات ضد العرب.. قِبِلها كلها، وكانت حجته في كده إن «التمصيل في فيلم عالمي زي ده فرصة كبيرة بالنسبة لممثل عربي، ومينفعش تضيع عنه».
كمان مفيش مرة قدم عمل لصالح أي قضية عربية، خاصة قضية فلسطين.. وكان بيبرر ده في أحاديثه بأنه ما زال في بداية حياته الفنية، وميقدرش يتحدى «اللي ما يتسموش»، اللي مسيطرين على صناعة السينما في العالم وهولييود، ويقدروا يقضوا على مستقبله الفني بجرة قلم.
ثم حدث عدوان ٥ يونيو، وكأن عمر الشريف مكنش في يوم من الايام عربي شرب من مياة النيل، وبيتنفس هوا الوادي، ويعيش على الأرض دي.. معلقش بكلمة واحدة تعبر عن حزنه.
أما آخر محطات قلة الأصل للنجم العالمي، فكانت الصورة المنشورة ليه في صحف ومجلات العالم، وهو بيداعب الممثلة الإسرائيلية باربارا سترايساند، في فترة من فترات الاستراحة أثناء تصوير فيلم مشترك بين «الممثل الذي كان عربيًا» والممثلة الإسرائيلية.
مداعبة عمر الشريف للممثلة الإسرائيلية مقصودة، عشان تكون «مادة» تتصدر الصحافة الغربية، تنشرها وتعلّق عليها، عشان يبدو الممثل المشهور بعيد عن كل ارتباط بأي موقف عربي، وعشان يقول لملوك صناعة السينما هناك: أنا مليش علاقة بالناس دي.. فمتقفوش في طريقي للمجد الفني والثروة!
مجلة «كانديد» الفرنسية اللي نشرت الصورة دي كتبت تحتها تعليق بتقول فيه: «إن هذه القُبلة بين عمر الشريف والممثلة الإسرائيلية هي القبلة العربية – الإسرائيلية الوحيدة!»..
وبكده، عمر الشريف «بيدفع نفسه إلى الحضيض»، في ظل عـ.دوان على الوطن العربي كله..
هنا إحنا بنسأل: إزاي بنسمح لغاية دلوقتي إن عمر الشريف، بعد المواقف دي كلها، يحمل جواز سفر من مصر؟! إزاي نسمح ليه بأنه يحمل الجنسية المصرية؟
من هنا، بنطالب الوزير الثائر شعراوي جمعة (كان وزير الداخلية وقتها)، بأنه يصدر قرار فورًا بسحب الجنسية المصرية من عمر الشريف، لأنه مبقاش يستحق الشرف ده..
