حدوتة عيلة المخرج الكبير محمد وعمر عبد العزيز من أولها لآخرها

دي مش أي عيلة، دي عيلة الجناتل والجانات..
عيلة طلعت مخرجين ونجم شباك ومونتيرين كبار.. دي حدوتة عيلة المخرج الكبير محمد وعمر عبد العزيز من أولها لآخرها

الحكاية بدأت من بيت خرج منه أربعة إخوات.. محمد عبد العزيز الكبير واللي بقى صانع البهجة ولقبوه خليفة فطين عبد الوهاب بعد ما عمل ثنائية تاريخية مع عادل إمام في أفلام.

وأخوه الأصغر عمر عبد العزيز اللي مشي على نفس السكة وبقى مخرج مهم بأفلام زي الشقة من حق الزوجة ويا رب ولد.

محمد عبد العزيز اتجوز الزوجة الأولى السيدة سهير عبد العزيز وخلفت له كريم وياسمين.

كريم كان لازق في أبوه في الاستوديو وبدأ يمثل وهو طفل في فيلم انتبهوا أيها السادة، وبعدها بقى الطفل الشهير في المشبوه مع عادل إمام وسعاد حسني من إخراج أبوه نفسه.

وبعد الانفصال محمد عبد العزيز اتجوز السيدة فريدة وهي اللي مكملة معاه لحد النهاردة وبتظهر معاه في كل المناسبات.

أما السيدة سهير والدة كريم وياسمين فتوفت في مايو 2024، ومحمد عبد العزيز هو اللي نعاها بنفسه وكتب “البقاء لله توفيت إلى رحمة الله السيدة الفاضلة سهير عبد العزيز والدة الفنان كريم عبد العزيز وياسمين عبد العزيز”.

كريم اتجوز مرتين.. الأولى الصحفية سماح غنيم سنة 2002 ولم تستمر طويلاً وانفصلوا بعد سنة في هدوء، وبعدها اتجوز في نوفمبر 2006 هايدي هاني سرور بنت رجل الأعمال هاني سرور، وربنا رزقهم ببنت وولد: ملك (2007) وعلي (2010).

أما ياسمين أخت كريم فاختارت تبعد عن التمثيل.

أما عمر عبد العزيز اخو محمد وعم كريم فاتجوز في شبابه وانفصل، وبعد فترة عزوبية طويلة اتجوز وهو في السبعينات في فبراير 2024 من السيدة أماني صفوت وعمل فرح حضره عدد كبير من الفنانين، وبعدها أعلن بنفسه انفصاله عنها.

نيجي بقى لفرع الأخوات البنات اللي هو سر العيلة.. الأخت الأولى لمحمد وعمر عبد العزيز خلفت المخرج الكبير محمد ياسين بتاع موجة حارة وأفراح القبة، وخاله محمد عبد العزيز هو أستاذه الأول اللي اتتلمذ على إيده واشتغل معاه مساعد في البداية.

أما الأخت التانية فخلفت المونتير أحمد فاضل والمونتيرة دعاء فاضل.. والاتنين اختاروا يشتغلوا ورا الكاميرا في المونتاج.

الجميل بالرغم من كل الشهرة دي، العيلة دي عمرك ما سمعت عنهم خناقة أو فضيحة.. عيلة هادية ومحافظة على بعضها، والفن عندهم مش شغلانة ده ورث بيورثوه بالمحبة.